Pu Kai Suang leh Pi Thuk Vung te ta 6 a neih sung panin a nih na hia, 1920 kumin Thuklaiah suak hi. SPS Khuasak pan Tan 4 a zawh khit ciang Galkap tum hi. Japan galsungin Japan te nasia takin a do te ahi hi. Brigadier Wingate makaihna sungah kihelin Japan te lampi khak tan dingin vanleng (Lithi) tawh Kawlgam mun tuamtuam ah tuak uh hi.
Shwebo khua ah Japan Galkap ten that dingin a umcih laitakin Daw Phwa Tin in sihna ding pan na hon khia ahihmanin galven khit ciangin 1947 kumin Mingalardon Anglican Church ah kiteeng pah uh hi. Sihzang mi sung panin namdang zi a nei masa pen zong ahi hi.1940 kum Kawl galkap ah lut hi. Japan galciang India ah nungkik hi. Mangkang galkap sungah thukan sem in, 1945 kum ciang second Chin Galkap ah Captain ngah hi.
1950 kumin 2nd Emergency Chin Rifle Shittwe ah Major ngah to hi. 1962-1972 kum sung Zogam khuapi Hakha ah Chin Affairs Supreme Council Chairman in kiteel hi. 1972-74 dong Kawlgam ki-uk zia ding constitution bawl in kihel hi. SHS Thuklai sangah Kawl sia te hong tun theih nadingin vaihawm sak hi. Kalemyo leh Hakha mawtaw lam a tun nadingin hoihtakin lam hong hi. 1975 kumin Galkap pension leh Naingnganzi pension la in Yangon ah teeng hi. 1989 kumin leitung nusia hi.
Tanu Nu Vung Dim Lian (Aye Aye Lian) BA(Hist)., DBL. bek nei hi. Tunih nei a, (1) Nu Vung Cin Lian@Daw Khaing Zar Win, LLB, LLM, (2) Nu Lian Cin Huai@ Major. Do Khaw Thawng (Dr. Steven) MBBS (1919-2003)