Pu Vum Thawng leh Pi Pau Niang te ta 6 sung panin a u pen hi a, 30.8.1924 ni-in khuasak ah suak hi. 28.12.1954 ni- in Pu Thuam Kam tanu Nu Cing Khup tawh kiteng a, tapa 3 leh tanu 3 nei hi. A tapa lian pen Pa Thawng Za Cin hi a, Ministry of Industry ah Assistant Director sem hi. Khuasak ah Tan 4, Tedim ah Tan 7, Falam ah Tan 8, akah sung Japan gal hong tung a, Japan galkap DCA sungah lut hi.
1944 kum ciang Japan te lang panin Siyin Independent Army (S.I.A) ah lut in Captain tawh kipan hi. Japan gal sungin India (Shillong, Guahati) ah tan 10 ong in Gordon College ah sang zom hi. 1947 kumin Rangoon University ah I.A (B) a kah laitak in galkap sungah 2nd Lt tawh lut hi.
1947-1949 sung Insein ah, 1949-1957 Pyi khua ah Captain za tawh sem hi. 1960 kumin Major ngah a, Thai/Myanmar gamgi ah Mangpi za tawh zong sem hi.1965 kum ciang Lt. Col ngah in Mauben ah piang in, Irrawaddy gam sung tual gal khempeuh vat mai na ah makai sem hi.1971 kumin South West Command panin Party Nilakhan kusale in kiteel hi.1972 kumciang S.W Command an Q.I sem hi.1977 kumin Party Central Committee ah kihel a, Chin State Council Chairman hong sem hi.1981 kumin Falam Township panin Hlutdaw Kusale (M.P) in kitel a, Chairman of Chin State Regional Party Committee ngah to leuleu hi.
1985 kumin Tedim panin (M.P) in kitel kik a, Chairman of Chin State Regional Party Committee time khat sem kik a, 1988 dong ahi hi. Kumpi na a sep sungin biakna lamah zong a septheih zah in kipia a, Rakkhine, Sittui ah a seplai in Rakkhine Baptist Association pian nading panpih hi. Pension khit ciang zong Rangoon Siyin Baptist Church ah life-time Deacon sem hi.17.3.1994 ni-in Topa tawh mangkhawm hi.
Tanu Tapate: 1. Pa Thawng Za Cin (B.Sc.) Asst. Director. 2. Rev. Dr. Khai Za Neam (B.A. M.R.E, DMCS) 3. Nu Niang Khan Cing (B.Sc.Zoology) J.A.T. Dagon (1) 4. Nu Ngo Uap (2005) 5. Pa Zam Khaw Lian (Seaman) (2009) 6. Pa Kam Khan Khai