Nidang lai in ah lokho nupa khat a om hi. Tua nupa te lotaw ah Kei tui a om hi. Tua Kei tui kiangah tui khuk dang khat a om hi. Tua tui a nin hi. Kei tui pen siangtho in a namtui hi.
Khatvei a nupa un lo a kuan khawm uh hi. A zi in tui duh a, a pasal in va tawi hi. A zi dangtak lua ahih manin a gai pahpah hi. A gaih pahpah ciangin a zi in hi thei mahmah kei, ken va tawi dih ning a ci hi. A pasal in Kei tui pen ciam kha niteh ci in a phal kei hi. A zi in ciam peuhmah kei ning, a cih ciangin A psal in a tawi sak hi.
A kuan ding ciangin a pasal in ahih leh va tawi inla, Tuikhuk a siang pen Kei tui hi. nong sukha peuhmah kei in. A nin pen hong tawi in, ci-in limtak in a vai kha hi. Azi tui tawi dingin kuan a, a nin pen a dim hi. A dip khit ciangin bang a ci peuhmah hiam ci-in Kei tui a khutmedawn in su a, a ciapteh leh sahang a suak pah hi.
Lo nawl a tun ciangin, a pasal kiangah hong zah zo lo ding hing, na tai in, a ci hi. A pasal in Cimah ing e ci-in a kah kawmin tai a, ih nau ka bangci khawi ding hiam ci-in a dong hi. Sahang in khintung a, umpi sungah zuha om incin, tua na pia in.
Lunghimawh kei in, ken zong kong vaak pih ding hi a ci hi. Tua ciangin a pasal kap sa in inn ah a ciah hi. Sahang in zansimin bikhalap nuai ah sazuk phei, sakhi phei, ngal phei, vom phei a va koih zel hi. A sawt vei ciangin mihing phei khat a va koih hi.
Tua ciangin a pasal in hong puak nawn kei in ci in a puak nawn kei hi.
Nidangin Tualkhiang khua kiang ah Kei tui khat aom hi. Ahih hangin tu in lei kivut a, Kei tui a om nawn kei hi. A mun a kitheih nadingin suang kiphuh hi.
reference: https://www.youtube.com/watch?v=EebZhnW7TSs