Thuklai suanh, Lunmun tuu, Tunngo bawng Rev Za Khup le Pi Ciang Zam ii tapa 3, tanu 5 a nei sung panin a lianbel hi a, 17th March 1917 ni in Thuklai ah suak hi. Khuasak, Tedim, Falam le Sagaing sanngpi ah sanng ka a, tan 10 ong hi. Japan ngal (2nd World War) hun sungin Western Chin Levis leh Chin Defence Army ah a lampuipi pa’ hi.
Ngalven ciang Falam Mangpi zum (Deputy Commissioner Office) ah Stenographer in kumpi nasep kipan hi. Kawlngam suaktakna (Independent) vai kikupna Panglong Conference 1947 February tha ah Zongam Ukpi maikaite kamphen tu in azui pen, ama ii teina le pilna te Bogyoke Aung San le Kawlngam makaite in amuh ciangin Kawlngam phutcil natu vai kikupna (Constituent Assembly 1947-1948) a Zomi 7 sungah kihel pai hi.
Kaalkhat kumpi hun Gen. Aung San leh Thakin Nu (Interim Government) mualtung mite sungah a kise Deputy Counsellor and Cabinet Minister for Frontier Areas (Chin affairs) ah kiteal a, 1947 October 17 ni in London ah Nu-Attlee Agreement letmat thuuna ah Kawlngam kusale 5 sungpan Cabinet delegate in kihel hi. Kawlngam ki-ukna tu Upadi (Burma Constitution) le Ngam lapi (National Anthem) ngealna ah mi 17 sungah zong kihel hi.
1948 Kawlngam suatakna nga ciang Ministry of Foreign Affairs ah Deputy Secretary seamin 1955 kumin Kumpi Palai (Ambassador) in France le Netherland (1955-59), Indonesia (1960-65), Cambodia & Laos (1966-71), Czekoslavakia, Austria le Hungary (1971-77) ah seam hi. Tua hun sungin International Conference a tatuam ka a, UN meeting ah zong thum vei (1953,1964, 1965) ka hi. Non-aligned Movement Bandung Conference ah zong kihel hi.
Dr.Vum Ko Hau sia ama le ama hanciam in pilna zong a, thu le la kanin (Research), ngual ii phak zawk ngawl, aheakhuai, aneihuai, adeihuai thu le la, datpung (photo) le vanngilte amu zaza keamcing hi. Ama deihteng, theihteng le a kihel nateng a teptena, namkim laibu khat Profile of a Burma Frontier Man ci a at sia Czechkoslovakia ngam Charles University Prague te in Sociology, Ethnography le History of Philosophy lam hoih sakna taw 1974 kum June 19 ni-in Doctor of Philosophy (Ph.D) pia hi.
Kum 2000 Centennial ah leitung bup mipil 5000 sungah ei Kawlngam pan in ama le U Thant kihel hi. Life Fellow of Royal Geographical Society of England, London le Life Fellow of Royal Anthropological Institute of Great Britain in 1957 ci in kiteal hi. Kum 1995 kum in leitung bup mi min thangbel te sungah kihel a, pahtawina letsong sang tu in London ah pai hi.
Thuklai State High School ih nga na sia zong ama ii vaihawm thiamna hang hi. Kumpi in Sithu(1948), Naingant Gonyi First Class (1974) in paktawina pia hi. Pension alakk zawk ciangin Pathian Ambassador seam laleu hi. Buanman khua Chief Za Khup ii tanu Nu Mang Ko Ciin taw ki teang a, tapa 3 le tanu 5 nei hi.Yangon ah teang hi. July 22,2006 in hong nusia a, July 24, 2006 ni in Yayway ah ki vui hi.