Pa Kam Za Cin (Gualnam-Munsuang) leh Nu Hau Khaw Niang te sung panin 22.3.1953 kumin Thangzang khua ah suak hi. Kum 7 in sangkahin tan khat ah ka tu pah hi. Kum 12 ciangin Tedim ah tan 5 kahin nulehpate kiang Tedim lal ding kakun hi. Tan 7 ciangin Leilum Lawibual ah lal in tan 10 ciang kakah thei hi.
1967 kum ciangin Adventist te thupuak za-in ka pompah a, ka upna leh kamuh thuman hangin tan 10 laivuanpi a tawp khak ni subject (Math) pen Saturday Sabath tawh kituak ahih manin phimanlo in Biakinn lam ka beel zaw hi.1974 kum ciangin India panin Division School Leaving Certificate India te High School tan 12 tawh ki bang Letmat kangah hi. Spicer Memorial College ah nipikal khat in nai 40 nasem in nipikal khat in nai 8 bek sang kakah hi.
Kum 4 ½ sung tawntung nasem kawmin sangkahnapan kamat te hoih toto ahih manin Scholarship ngahin Library leh Night Study Hall te ah Monitor semin BLA Degree kangah hi. M.A zom pah ding kacih leh sangkhak sung laibu zuakin kazin leh sang tung zo nawnlo in 1980 kumin zi ka nei a, Pasian nasep zong ka ki panpah hi. 1981 kumin ta khat kanei a, Ngen te Biakna pawi kasim leh Topa sapna kangah a, Pyidawtha Adventist Pawlpiah kum khat Pawlpi kakem hi. 1982-85 sung Singunau a om Upper Myanmar Adventist Seminary ah sangsia kasem hi.
Tua pan Myanmar Union Adventist Seminary ah ka tate tawh sang kumkhat kahin 1986 kum tua sangah sangsia ka semsuak hi. 1991-1995 sung Philippine ah Adventist International Institute of Advanced Studies ah Master of Pastoral Theology leh Master in Theology zo in Myaung Mya sangpi ka tung kik uh hi. 1995-1997 sung Librarian, Religious Head ka sem hi. 1997-2001 dong Yangon Adventist Mission Zumpi ah Education Director term khat ka sem hi.
Bul lam ten Fund hong zon sak in, Ph.D sin dingin Philippine mahah 2001-2007 March kha dong kahin ka zo hi. Ka innkuan un kizui kawikawi thei kahih manun Pasian thupha ahi hi. Ka Ph.D kah kum 4 ding pen kum 6 hong sawt ahih manin leiba kaneih man leh hong sapna tawh kizui in Indonesia ah University of Adventist Indonesia Ban dung ah kum 2 ka sem man hi. 2014 August panin Tulsa, Oklahoma ah Zomi Adventist Pawlpi makaih dingin kapai hi.