Pian na: Rev. Dr. Tual Khan Pau(Pau Sen) in apa Hen Khaw Thang(Gualnam, Songlam) leh anu Ciang Dim(Songpu)te sung panin 8.4. 1951 ni-in Mualpi khua, Tonzang myone ah suak hi. Unau pasal 5 leh numei 5 laka amah a upa pa pen hi a,anaute in, pa Tuan Za Khai, nu Ciin Hau Vung, Zen Lam Cing(aneu lai-in si), nu Dim Lam Cing, pa Vum Za Suan, pa Kam Thawn Pau, pa Do Khaw Thawng, nu Cing Ngaih Man, nu Cing Sian Niang te ahi hi.
Sangkahna: State Primary School Mualpi-ah 1962 kumin tan 4 zo hi. Tedimah S.H.S. ah tan 5 leh tan 6 zo a, tan 7 pan tan 10 dong Tonzang S.H.S ah 1970 dong kah hi. Kum nih sung khawng sum zonga 1973 kum teh Tedim ah tan 10 sinkik hi. Tedim sang a kah sungin Mizo gam panin pu Za Dawla in Tedimah hotkhiatna thu tangko a, tua lai-ah mimawh ahihna le Honpa a kisap thu kiphawk hi.
Pianthakna: Sangkah zom thei nawn lo ahih manin khualzin kawikawi in sum zong hi. Pilna lam, sum zonna lamah ama khempeuh bingin a om banah mimawh ahih lam kiphawk a, Pasian tungah ki surrender in February 28,1975 Mualpi khua-ah Rev. Hau Lian Kham tungtawnin piangthak hi. June 20, 1976 Hebron biakinn, Hyderabad, India ah pastor Augustine in tuiphum hi.
Zi neihna : 1979 January 6, ni-in Rev. Tun Za Lang leh nu Cing Khaw Dim te tanu lian pen Ning Suan Cing tawh Mualpi E.B.C. biakinnah Rev. Vial Khaw Hau in nupa suaksak hi. A tate in Thang Suan Dong B.Th.(Philippines), M.Div.(Singapore), Bible College professor, sem a, South Korea ah Th. M (Candidate) sin hi. Lang Sian Mung L.L.B., Diploma in political Science (Open University, U.K.) Bible College professor sem hi. A tanu Dim Khawm Lun in B.Com., M.Div. zo a, Sunday School siama sem hi. Dim Lian Thang B.Th. leh M.Th. (candidate) ACA India sin hi.
Pasian thu sinna leh training: 1. B.Th. Bharat Bible College, India (1975-1980). 2 Evangelical Fellowship of India Commission On Relief (EFICOR) training Bangalore(1980). Poultry farming; social development cerificate ngah hi. 3. A sang lui mahah B.D. 1987 in ngah hi. 4. International School of Theology-Asia, Philippines ah M.Div.(1998-2001)ngah hi. 5. Haggai Institute, Singapore ah Leadership training kah( 1989) hi. 6. Kum 2003 in Cambodia gamah International Prayer Conference kah hi. 7. Kum 2005 June kha-in Seoul, South Korea ah ICCC(International Council of Christian Churches) conference kah hi. 8. January 31, 2015 ni-in Faith Baptist Theological Seminary in D.D. pahtawina pia hi.
Pasian nasepna: 1979 October panin 1980 May kha dong free evangelist, khasum sang lo-in sem in hotkhiatna thu gen kawikawi hi. 1980 August kha panin February 1981 dong Munlai ah Evangelist sia sem hi. February 28, 1981 ni-in EBC gambup khawmpi Tedimah full time sia kipia a, March 1,1981 ni- in ordination zong kipia hi. Kum 1981-1982 sung Tamu Township E.B.C. khawk Pastor semin, Thitsetgone vengah om hi. Tahan E.B.C. gambup khawmpi-ah (1982)gambup Associate Secretary dingin kitel a, Tedimah 1982- 1984) sung sem hi. Tua a sep kawmin Tedim pawlpi zong kem hi. Hih hun sungin EBC gambup ah a tawmpen khat vei pawlpi khempeuh van a, tua banah “Thupha puak” editor zong sem hi, Kum 1984 pan May 1986 sung K.T.E.B.C.khawk pastor semin Tahanah om hi. Kum 1987-1988 sung Tonzang pawlpi kem hi.
Tonzang a om sungin Kachin K.B.C.(Mhuyin) te kiangah kha li sung Myikyina, Bamo, Mukawng khuate- ah Pasian thu gil hilh kawikawi hi. Kum 1988 gambup khawmpi Pyidawthar ah gambupAssociate Secretay dingin kitel leuleu a, Tedimah 1988-1991 sung semin “ Thupha puak” editor zong sem kawm hi. kum Tamu EBC khawmpi ah General Secretary dingin kitel a, tua kum pan 1997 dong General Secretary term nih semin Tedimah om hi. Hih hun sungin “ Thirty for Three Years for Christ”(TTYC) phuankhia a, mi 30, kum 3 sung kipia a, gospel nasia takin kisemin mi tampi tak piangthak hi. Kum 1997-1998 sung Tedim pawlpi kem hi.
Philippines panin a M.Div. ngah hong ciah ciangin Yangon ah omin Pasian nasep kipana, 2001 September 9, ni-in Friends Evangelical Baptist Church phuan hi. Tua a pawlpi a kep kawmin Bethel Baptist Bible College, Southeast Asia Bible College, le Faith Baptist Theological Seminary ah part time sia sem kawikawi hi. June 1, 2004 ni-in “New Life Orphans Center” naupang kepna phuan a, naupang 7 bek tawh a kipat pen tu’n naupang 18 tawh om hi. Pasian in naupangte omna ding inn khat 2006 kumin pia hi. Hih naupang kepna panin naupang tampi tak kipantah khin a, mi 2 in tan 10 ong hi. .July 22, 2004 ni-in “Faith Biblical Academy” Lai siangtho sang phuan hi. Lukhu nelkai 9 vei kipia khin hi. A khan sungin pawlpi (local church) 8 phut leh a phuante laka a makai-in kihel hi.
Pasian na a sep na sunga a tuahkhak thute tungtawnin amuh khiat thu nihte in: 1. “ Pasian na sem le’ng Pasian in ei na hong sepsak hi.” 2. “Hong it a hong deihsak, hong angvante pen i lawm hoih hi a, hong deihlo, hong nawl khin, hong pampaihte pen sangpi i tun theih nadinga hong lamto i sia hoihte ahi hi” cihte hi. Topa minthanna hi hen.