Pangzang Khua

1. Khuasatna thu leh Khua min vawhna thu

Pu Kam Za Mang (Sukte) in 1925 kum in Tuipi panin Pangzang khua sat hi. A mun zangin Pangsing tampi po ahih manin ‘Pangzang khua’ ci pah hi. Pangzang khua akisat theih na thu in nidang lai in gungal gam pen Falam gam ahih manin Pu Za Tual in Falam ukpipa Pu Con Bik tungah a leisa ahi hi. Hih a gam teng a kep nadingin Muallum khua sat in a teng hi. Muallum ah a ten sungin apa Pu Kam Hau Tedim ah a si hi. A pa sih ciangin Tedim khua ah vaihawm dingin tengkik aa, Muallum nusia hi. A gam leina munte ah a tate hausa dingin paisak kawikawi aa, 1888 kum in a tapa Pau Za Lian in a pawlte tawh Tungzang panin Tuipi khua sat hi. Pu Pau Za Lian leh anau Pau Cin Thawn in Tuipi hausa dingin Haupi khua aa Pu Thang Kam tapa Kam Za Mang a neulai mahin na la hi. Kam Za Mang hong khangcin ciangin 1920 kum in Pu Pau Cin Thawn in a hausa nasep Kam Za Mang sem sak hi. 1925 kum ciangin Pu Kam Za Mang in Tuipi panin Pangzang khua sat hi. A sat tuung in, kha 6 sung amau innkuan bekmah a om uh hi. A sawt loin Keltal khua panin Pu Kam Khaw Thang (Khuptong) in beel aa, a nung ciangin Tuipi panin pawlkhat in zuan in inn 20 bang a pha uh hi. Tua panin mi teng suaksuak in tudong in khuakip khat a suak hi.

1. Beh om teng
   1. Sukte
   2. Hangsawk
   3. Lethil
   4. Gualnam
   5. Thangnok
   6. Guite
   7. Naulak
   8. Buansing
   9. Khuptong
   10. Nekgen

1. Pawlpi om teng
   1. ABM
   2. AG
   3. Emmanuel

1. Sanginn : Basic Education Primary School, Pangzang
2. Zato :  Sub Rural Health Center (28.12.2009), Pangzang
3. Inn phazah (Feb, 2023) : 10
4. Innkuan phazah (Feb, 2023) : 12
5. Mi phazah (Feb, 2023) : Pasal (39) + Numei (37) = 76
6. Kivaakna
   1. Lo khawh
   2. Gan khawi
   3. Gamdang pai
   4. Kumpi nasem

1. Khuami te sungpan a madawk deuh te
   1. Kam Za Mang, Battalon Commander (Piantit pailai)
   2. Cing Lam Lun, BA ngah masa
   3. Tual Khan Pau, MA ngah masa
   4. Gin Khaw Kam, BSc ngah masa
   5. Dai Khan Thang, H/A
   6. Kap Khen Pau, Zomi lakah MBA ngah masa leh FPB ah BOD

1. Thu tawk nate
   1. Cin Za Khen, hausa
   2. Public Health Department record file, Tedim Hospital
   3. Schools Profile, Basic Education Department – Tedim Township
   4. Gamlai Siakhawk Tuiphum pawlpi kipawlna Diamond Jubilee Laibu, 2020