Pu Kham Thuam (Sukte) leh Pi Gawh Ciin te sung panin Mualbem khua ah suak hi. Sanggam te: (1) Kam Hau, (2) Go Pau, (3) Za Khai, (4) Za Pau, (5) Khan Zam te ahi hi. Mualbem panin Lamzang ah 1800 kumin pai a, Hausa kum 5 sung sem hi. 1805 kum ciang Tedim ah pem leuleu a, tua hun in Tedim ah Gui te na teng zo ahih manin leh gal leh sa hat lua ahih manin teng tul zo lo in Lamzang ah ciah kik hi.
1810 kum ciangin Kam Hau leh Khoi Lam in Falam gam Ngal tu khua a teng Mang Gin zol uh a, Tedim ah teng kik uh hi. Tua bangin Kam Hau in thu khempeuh kei ma thu hi ci lo in Hatlang te, Kamdong tapa Mang Gin leh Hatzaw te Khoi Lam tawh thu kikum in vaihong hawmkhawm uh hi. Tedim khua inn 300 hongphak ciangin tulaitak ih zat Tedim pau hong piangkhia hi.
Tua bangin a seppih upa teng thum hong minthan ciangin Vaiphei te in hi bangin la khat na phuah hi.(a) Sinthu soi ding, Tual awn pa aw, do cih tu lut, Am thang pa aw,(b) Do cih tu lut, Am thang pa aw, Van nuai tun sial a lut na, Za tual pa aw, na ci hi. Zineih na:Kam Hau in Guite tanu Ciin Ngul zi dingin la hi. Pi Ciin Ngul a pi khiat laitakin mei lum in mopi te a nungah zui liai liai hi, kici liang hi.
Kam Hau tate in: (1) Za Tual, (2) Thuam Lian, (3) Lian Thang, (4) Thang Khaw Pau, (5) Hau Pum, (6) Khua Cin te ahi hi. Vanneih minthang te: Kam Hau pil leh tei thuah in hong hau sem sem a, Zogam a sum minthang khempeuh a ngah nading hamciam hi. (1) Lang za dak minthang, (2) Ton kai dak bu zong sial 100 in lei hi. (3) Ngal ngam tui thawl hu, (4) Thang Ho phih tu kuangpi, (5) Thang Pum kitat na takok lom 9, (6) Mualpi te zam kang minthang nei khin hi. A ngah nail oh Guite nuai suk dak minthang leh Mang Vung (thahdo) te pai te pa Zam no mai leh Sawm Sing Khi minthang ahi hi. Kam Hau Upadi: Kam Hau in Tedim gam khua 135 uk ahih manin thu leh la vaihawm ding hong tam semsem hi. Hih a nuai a teng tawh kikum in vaihawm na hong nei hi.1. Kam Hau-Ukpi pa (Sukte), (2) Pau Vum-Upapi (Sukte), (3) Mang GinGalkap mang (Hatlang), (4) Khoi Lam-Thu leh la vaihawm (Hatzaw), (5) Kim Thuam-Upa (Zillom), (6) Tel Khat-Upa (Hatzaw), (7) Pau Am-Upa (Samte), (8) Cin Kim-Upa (Samte).Kam Hau Upadi sungah khenpi 24 leh khenneu 143 om hi. Kam Hau Tedim khua ah teng a, Ukpi asep sung A.D 1868 kumin hong si hi. Beh leh phung tu leh ta a uk na gam sung mi ten Zongeina cingtak tawh lungkim huai tak in gui hi. Nau zaw inn luah ahih manin a gamh teng Khua Cin in luah in vaihawm in hong om hi.