Pu Gen Pum leh Pi Ngaih Ngul te sung pan 1.3.1922 in Saizang khua ah suak hi. A zi Nu Niang Za Ciin hi a, tanu 3 leh tapa 6 nei uh hi.
Sangkah na: -1928 pan 1932 dong Primary School Tedim ah kah hi. -1932 pan 1936 dong Anglo Vernacular Middle School Tedim ah Tan IV,V, VI kah hi. – 1936 pan 1939 dong Anglo Vernacular High School Falam ah kah hi. -1939 pan 1940 dong Anglo Vernacular High School Maymyo ah Tan VII, VIII, IX kah hi.-1940 kumin Maymyo pan (matric) ‘A’ list tawh ong hi.-1941 (Aug-Dec) in Morse Signal, CTO, Yangon ah kah hi.
Nasep na: 1940 in Tedim Vuandok zum Apprentice Clerk sem hi. 1941 kumin Myitkyina leh Bhamo ah Land Reserve Clerk sem hi. 1942 pan 1944 dong Sub-Postmaster Fort White leh Champhai ah sem hi. 1944 pan 1945 dong Civil Affairs Office, Tedim ah lai-at sem hi. 1947 kumin JAT Tedim (ZEB) ah sem hi.
1948 kumin Election Officer, Falam ah sem hi. 1949 pan 1950 dong Tedim ah JAT sem hi. 1951 pan 1978 dong Tedim, Falam, Mindat leh Tonzang ah Dy I.S. (Pinya-uk) sem hi.Chairman, Township People’s Council Tedim (1978-81), Member, Chin State People’s Council (1985-88) parttime seem hi. 1978 pan 1981 dong Hakha ah Member of Chin State Executive Council sem hi.
Kumpi te tung pan pahtawina: Ministry of Education pan Tamuha Medal (1955), Peace & Tranquility Medal (1983), Law & Restoration Medal (1983), Public Service Medal (1994) leh Thau (S.B.B.L) lawng khat, (Ministry of Home Affairs) te ngah hi. Akhan sungin Zomite’ lunggulh bel thaulawng nih leh thautom (Revolver) khat na lam hi.
Biakna lam: 1946 kumin Tapidaw tang suahin 1947 kumin innphiat uh hi. March 7, 1947 ni-in Rev. Cin Khua Gin in tuiphum hi. Kumpi nasep tawh a tuntun na khuate ah Pawlpi te tawh nop kisa in na seem khawm thei uh hi. Chairman, Saizang Baptist Church, Chairman, Tedim Surburb Baptist Church, (1983-85), Chairman, CMBC (1990-91), Treasurer, Baptist Theological School Tedim te-ah ahih theih bangin maa pang hi. Lai Siangtho sangah kum nih sung thaman la lo-in English-subject hilh hi. T.B.A-G.C leh E.C sung a kihel lai in hunbit sia te kum cin ciang pension ngah theih nang hanciam in tangtun pih hi. 1995 kum a (51) veina Tedim Baptist Association kumcin khawmpi leh Cope Dimond Jubilee pawi pi ah a nupa un Pasian tungah lungdam kohna Golden Jubilee pawipi kham zo hi. A nuntak sung adeih deih Lai Siangtho mun leh la in: (Paunak 3:5-10, 16:3,9,11,13, TDM 296) te ahi hi. A it a zi in 15.11.2003 ni-in Topa kiang zuan aa Pa H.L Neng Khen Thang in 8.12.2010 ni-in Topa kiang hong zuat san hi.