Minpi le beh: Thang Sut Mung, Hatzaw
Kham khua: New Darkhai
Tulian omna: Lansing, Michigan
Suah kum: 1992 Lai Pilna : B.Th, Associate Degree in applied Science, Digital Media Specialist
Pianna Tuun leh Zua min: – Dim Cin Niang ( Nu ) – Rev. Dr. Peter Khen
Laizom sanggam te min: Nu. Cing Hoih Zo Nu. Dim Muan Lun Swanson Pa. Nang Sawm Deih Tuang Tg. Paul Sian Sang Lia. Ciin Sian Mawi Tg. Kap Sian Zo Tg. Thang Sian Lian
Ukna (Hobbies): Limlak bawlna (Filmmaking), Tukpeng suihna (soccer), Guitar tum leh lasak.
LST Mun : Late 91
GZC Q1. Hong dongpah saisai nung, Movie Director, Executive Producer le movie tawh a ki nahvawh limlim lam nong kidiah zawh asawt ta na. Bang in movie/film lam hong uksak hiam?
TM- Kei pen kaneu lai Yangon, Mingalardong ah Mission semin kapa in hongom pih laitak in movie uk mahmah khat kahih manin. hunawng kaneih sunsun niangtui saiah movie etna in hunka beihi Sum neihloh banah, kawlgam haksat na dinmun panin, movie bawlding cihpen sunmang, zanmang nangawna in matngamlo, kawmkal ah gamsung buaina tuamtuam hangin USA ah refugee tungtawn Topan ong tunpih hi. India ah Laisiangtho sang kum nih kazawhkhit ciangin, Apostolic Biblical & Theological Seminary (ABTS) ah ( B.Th) degree ngahin USA ka tunkhit ciang hotel room hahding, Ramada Inn ah nasep kaki pat masak napen mun ahihi. Kum 18 kakum cingkhin tain mangpau manglai siamlo, tuaban ah unau nih leh thum Topa in hong pia in, ukna veina te kasinnop kazonnop hangin, full-time tawh nasep leh, innkuan et leh, pilna zonding zom mengmeng zolo in ka om hi. A hih hang kapa in tha hongpia in ESL pen Lansing Community College ah hong kahsak laitak in Indianapolis ah Mission vai tawh kapa in tawmvei sung hong ompih a, Amazon warehouse ah sum thalawh in, ka inn kuan pih ka vak hi.
Indianapolis Amazon ah na kasep theih nading GED kasin khitteh, Diploma ngah ing. Inn kuan van kawm enkawm leh, Lansing City, aom Anneli tawh kingai in, Topa thupha tawh 2013 kum in pumkhat suahna kanei uha, tapa KHEN ZA KHUP leh tanu NIIANG SAN KIM tanih kanei uhhi. Kapa in, Mission nasep kum hongcing leh, Lansing City ah kituah kik nuamding ihih teh Lansing ah, nazi tawh naom khol unla kozong hongdam paiding hiungh hongcih ciangin Lasing ah 2013 kum in kazuan kik hi. Kazi tawh Refugee Development Center ah kasem khawm uha, interpreter nasep semin, Refugee Development Center ah seasonal position dinmun ah Topa thupha tawh katungsiahte pahtaak naleh deihsak natawh, full-time employee leh Interpreter coordinator position panmun, khathum sungin hongpia uhhi. Refugee zum ah nasem kawm, sangkah kawm, inn vai vankawm buaina leh haksat na in hong vuk ahih manin huisan hun hongtam mahmah, haksa vangik puakawm sain khitui muallaam hun zong hongom hi.
Haksat nate hong kithuap luatteh fulltime in, sangkahzo lo kahih manin kumnih sunga, sang kaman zawhding kumli sung sang kakah kha hi. Sang kaman ding ciangin, kasang aten internship nasem ding hongci uha, News 6 ah internship nasep ngah in, Internship pan company tuamtuam te a ding commercial bawlna lamah nasep lianpi Topa in hong semsak hi. Tua kawm kalah kanasep na Refugee Development Center hongkhang to semsem in, City of Lansing, Federal School Impact Grants, leh DHS Health Department te tawh na semkhawm in tutorial videos tampi produce thei ahih manin nasep hongtam mahmah a, project teng khem peuh ading zong vaihawm in, producer, creative content director, leh editor lamah avek piin kasem hi. Ni khat, sang zom zawding maw movie lam zuisuak zawding cih khentat theilo, kaom laitak in homeground te tawh thu kanget khopuh leh, Sangvai pen Cybersecurity kahnuam si, ahih hang lah video bawl, kauk penlah kalung simsung ah thaamden den.
Nitak khat hunla in thu kanget leh movie bawlding Topa tungah awkhat kazak pen kahih theihzah tawpa sem nai loin plan B computer lam paiding cihpen haivai, Plan A hanciam photin cih Khasiangtho in kathunget pih homegroup te tungtawn pan movie bawlding khentat in cih kangah ciangin, SIN LAI GUH LING BANG DO cih movie bawlkhia in, Pasian hong deihsak na om hiding hiven mipi ten hongdeih sakin thahongpia uh ahih manin, EXILE ZOMI movie nihna ciangdong release theiding in Topa in alimci lawhcin namual hongsuah pih ta hi.
GZC Q2. Zomi movie bangzah bawl khin, midang, namdang ta kigawm in bangzah. Namdang ta ding Director/Producer nasem gei hiam?
TM- Directing leh producing lamtawh kisai bel ka nasep na REFUGEE DEVELOPMENT CENTER, FEDERAL SCHOOL IMPACT GRANTS, CITY of LANSING, leh DHS HEALTH and HUMAN SERVICES te kipawl natawh video tamveipi kabawl khiakhin zouh a, Narrative short film projects zong tampi tak kabawl zokhin hi. Tua ahih manin feature length film lian pen SIN LAI GUH LING BANG DO leh EXILE Pasian in thupha hongpiak na tungtawn in,mailam ah feature length film bekbek bawlsuak ding kasawm hi.
GZC Q3. Hiciang na tun na dingin hamsatna le haksatna bangzah vei tuak gei? Mikang te lak a kihel Zomi limcing/kineihsiam ineih khak na angtang hiam?
TM- Haksat na tampi katuak na sungah mangpau,manglai kasiamloh man in katheih dingzah, ka muh dingzah, thei kha lo, mukhalo haksatna, Sang kakah ciang,Zi leh ta family life leh nasep na balance naah zong haksat na tuakkha ing. Hollywood te tawh kidem ding cihpen million dollar budget kizeek zo nailo ahih manin,depression lutna tampi ommah taleh, ka nasep nalui pan aa ka leadership experience, a hi zong frugal/indie production experience te leh akua maciat hong thunget pihna tungtawn a lawhcing kahihi. A masa in ka feature length film masa pen SIN LAI GUH LING BANG DO movie ahih manin kipak mahmah leh ki angtang sak mahmah ing. Kalawm te pawlkhat in 56 million (Kawlte) market a ding banghang hihsawm zawlo nahi hiam cih dotna khawng hongnei hi. Zomi te kaitna leh kavei na tawh ZOMI movie mah hih masa nuaming ciin,executive decision kahih na tawh, ZOMI limcing/kineihsiam,mikang ten muhnop asak, lamdang asak etlawm asak nate uh kangaih sut ciangin, angtang kisa mahmah ing.
GZC Q4. Zomi te koici kalsuan leng mailam ah movie hita leh music lam kipum khat in ki khangto theiding?
TM- Kumpi za leh Siampi zangah ZOMI pilte ihihi, Thupha ngah ZOMI te ihih man in,Pasian leh ZOMI makai te tungah thupha ngenleng ZOMI te khantoh na hong kizom suakding hi
GZC Q5. Movie tawh a kisailo na gennop khatpeuh hong luikhia dingin hong thuum ungh. Kagen pakding theikeng. Hih danaa nong thapiak naleh nong lunggulh nauh, angtang kisa mah mah ing
KA THU KHUP NA : 1. Kapu in Van leh Lei kikal aom Khuapi te luahding in thupha hongpiak,alaitah na kammal ahihi 2. Siampi,Kumpi zangah a mi makai suakding kapa hong thupha piakna ahihi 3. Keima nuntaakna sungah aom ngeilo omsak ding ka nasep ahihi Kipat ngam sepngam na in lawhcin na hongpia hi. Tha hongpia GZC | Zompiedia leh mimal khempeuh tungah lungdam mahmah ing.
GZC Tanute: Manlah, buai kawmkawm pi mahtawh na hun manpha hong khenkhia teta nahih manin nang sangsang in koh lungdam zaw ung. Mailam ah nasinna, nasep, na kalsuanna ding te ah hong lamzang toto in maw.
