Rev. Kham Suan Hang in Pu Zam Langh leh Pi Vung Khan Kimte sung panin 5.7.1974 ni in Laaitui khua ah suak hi. A nu leh a pa deihsakna tawh kumpi sang tanlang kumkhat, Tan khat kumkhat, Tan nih kum 3, tan 3 kumnih, tan4 kum2, tan5 kum2 ,tan6 kum2 akah laitakin, 1988kum Gambup buaina hangin sang kikhak aa sang tawpsuak hi. 1992 kumin Laaitui mihau Pa Pau Za Suan in Laaitui Cialpi a bawlna ah Speaker Rev. Kam Cin Hau tungtawnin Zeisu gumpa leh Topa in sang a, piangthak hi. Hih pianthakna hangin mawhsakna, deidanna, bawlsiatna, thahnopna, inn luah theihlohna, hawlkhiatna tampite a thuak kawm in, Pasian thugenna, khutsiam nasepna, inn lamna, sum zonna, kuli puakna, singtangvakna tuamtuamte sem hi.
1996 kumin Thailand pai hi. 1997 December tha in Pu Nang Khua Thang leh Pi Ngai Khua Mante tanu Cing Khan Hau tawh kiteng in Pasian hehpihna tawh tapa 3 leh tanu khat nei hi. 1998 kumin Full Gospel Bible Training Center, Yangon ah Lai Siangtho sang kah in, zawhna letmat Dilpoma ngah in sang man hi. Sang a man phet in 16.3.1999 ni in Saizang Missionary kipanpah hi. Kum 2 val khit ciangin Saizang A.G. pawlpi phuan in, innbit 6 leh mimal 40 val tawh pawlpi in dinpih hi. Ahi zongin a khualzin kal in hazatna lian mahmah tawh na kitawpsak gai in guaksuak hi. Tua laitakin gam sung mi CNF ten man in gam sungah kaikhia in gam sungah bawlsiatna tampi thuak hi.
Tua khit kha 9 sung bangmah hih theilo gamtang theilo in om a, kha 9 a cin ciangin Pasian lam honsakna tawh Full Gospel Assembly pawlpi phuankhia leuleu hi. 8.9.2002 ni in Yangon panin License ngah hi. 18.12.2005 ni in Yangon Full Gospel Assembly pawlpi Senior Pastor Rev. Dr. Dam Suan Mung in Ordination pia hi. Tua ahih manin Saizang Full Gospel Assembly pawlpi ah Senior Pastor, Chairman, Missionary, Evangelist leh Piada tawh kopkhawm in sem toto hi.
Gamdang pai aa Pasian thugennate;
- 2008 – Singapore
- 2012 – Malaysia
- 2014 -USA
- 2015 – India, Mizoram Khuangleng khua ah Laaitui ta khempeuh ading in mimal (120) pai in, thupha ngetna leh mawh kimaisakna (Laaitui –Khuangleng kilemna) va la hi.
- 2016 – Australia
- 2017 – Australia
- 2017-2018 – USA
- 2018 – Australia
- 2019 – Australia
Tulaitakin Full Gospel Assembly, Saizang ah Senior Pastor sem in, a zi a tate tawh a innkuan un mapangkhawm laitak uh hi.
Source: Laaitui Magazine 2020 pan kila